Main raah e ekhteyar se hat kar nahi chala

میں راہ اختیار سے ہٹ کر نہیں چلا

یعنی کہ اعتبار سے ہٹ کر نہیں چلا

مجھ کو خبر تھی وجہ بلندی ہے میرا عجز

یوں ہی تو انکسار سے ہٹ کر نہیں چلا

جس نے کیا تھا راہبر اپنے جنون کو

وہ شخص خارزار سے ہٹ کر نہیں چلا

گھٹتا رہا نفس بہ نفس اور پھر بھی میں

دنیا کے کاروبار سے ہٹ کر نہیں چلا

اب کیا گلہ کریں کہ مراسم میں تیرا قلب

اٹھتے ہوئے غبار سے ہٹ کر نہیں چلا

بے سمت چل پڑا تھا تجھے ڈھونڈتے ہوئے

احسن مگر پکار سے ہٹ کر نہیں چلا

---احسن مرزا