har taraf anbisat hay ay dil

ہر طرف انبساط ہے اے دل
اور ترے گھر میں رات ہے اے دل

عشق ان ظالموں کی دنیا میں
کتنی مظلوم ذات ہے اے دل

میری حالت کا پوچھنا ہی کیا
سب ترا التفات ہے اے دل

اس طرح آنسوؤں کو ضائع نہ کر
آنسوؤں میں حیات ہے اے دل

اور بیدار چل کہ یہ دنیا
شاطروں کی بساط ہے اے دل

صرف اُس نے نہیں دیا مجھے سوز
اس میں تیرا بھی ہاتھ ہے اے دل

مُندمل ہو نہ جائے زخمِ دروں
یہ مری کائنات ہے اے دل

حُسن کا ایک وار سہہ نہ سکا
ڈوب مرنے کی بات ہے اے دل